Adiós, Liboriu de l’alma
ya nun t’alcuerdes de mi
que colando pa La Bana
ya nun vuelves perequí.
Cuando veas les cubanes
alcuerdate d’Avilés,
que’l corazón nun muerre
si ye que tien interés.
El bergantín Francisca
cruza los mares con rapidez
nun enturbies neña’l vientu
¡Ay! Pa que vuelva pronto a Avilés.
¡Ay! Vente comigo al mar
y nun me faigas sofrir
y si sabes amar dime que si,dime que si.
Todo en tu mano tará,
toda la tripulación,
y si sabes navegar
dende la proa al timón.
Y si me dices que si
sedrá la felicidá
de navegar contigo
tola ria hasta la mar.
Habanera d’Avilés, 1890.
13 de Xineru de 2000, Xueves.
Güei por fin entamamos a preparar dafechu el viaxe a Cuba. Camentaba ya que diba quedame’n tierra, pero non. Voi p’allá.Dende primeros d’Avientu que Carmen confirmóque yo podía participar na “Expedición Vasco-Cubana Mogotes 2000” fui iguando dalguna cosina, pero nun m’atrevía a preparalo todo por si acasu a la fin nun salía la cosa p’alantre.Al entamu atalanté meyorar les mios condiciones físiques, más piscina, correr daqué; pero sigún foron llegándome más nicios de que nun diba ser tan duro como camentaba fui baxando’l nivel. Agora toi nes bones condiciones de siempre p’aguantar cualisquier carretamientu y tamién cualisquier merguyu d’esploración.Como preparación sicolóxica volví a ver Guantanamera y Fresa y Chocolate, de Gutierrez Alea. Voi faciendome una idega con esto, magar que seyan películes y que delles vegaes la realidá supere la fición, sigún dicen. Tamién m’ayuda lo que me cuenta la xente que tuvo ellí p’atalantar lo que m’aguarda. Muchos collacios dicenme que ye tolo contrario del mió calter, asina que tendré qu’avezame a esi ritmu tan estremau de lo que yo quisiera.Relleo Mayita y vuelve a prestame tanto como la primer vegada. Lleo tamién Diariu d’un Viaxe, d’Adolfo Camilo Diaz y parezme muy intimista. Prestame más el so estilu cuando fala na voz de Xabel Peña.Pa la mió idega l’arranchamientu del material, en raxón de lo que vamos facer alló, va muy apurao. Pero bueno, Carmen y Angel, que son los profesionales, son los que manden.
16 de Xineru de 2000.
Guei despertome Angel a les 11 la mañana. Ayeri tuve de comedia per Avilés y fadiome enforma una llamada tan ceu. Falamos más de media hora. Ya parez que van aclariandose les coses.
26 de Xineru de 2000, Miercoles.
Ayeri mandé cuatro bidones de 120 ll. caun con tol material d’espeleo y merguyu. Dalgunes coses siguen sin tar nidies. Parez ser que los vascos mercaron poca comida d’ataque y va facer falta que nos merquemos inda más comida. Lo meyor, camento, ye que los merguyadores nos organicemos pola nuesa cuenta. Sigo ensín saber cual ye’l plan concretu del viaxe.
3 de Febreru de 2000, Miercoles.
Güei a les 2 llamame Carmen. El viaxe retrásase hasta el 15 de Febreru. Parez ser que ye una decisión personal de Raul Castro....Y yo que taba aprovechando pa despedime del orbayu d’Uvieu....
7 de Febreru de 2000, Llunes.
Por fin tamos en marcha. Confírmase la salida pa’l dia 15. Esta selmana d’espera va ser aburrida. Ya ta todo preparao y estos siete dies van ser llargos.
14 de Febreru de 2000, Llunes.
Despídome de Marife a les 7’30. Ye’l dia. Salgo de casa como los d’anantes que colaben pa La Bana, caleyando dende’l pueblu fasta la villa. Veme marchar Tono, qu’empeñase en baxame fasta Avilés. Digo-y que non y baxo pela carretera. El dia ye perguapu y dexame acolumbrar dende Los Eros tola cordelera, dende’l Sueve y Picos fasta los innumberables montes ensín nome pa mi dende equí que lleguen fasta´l Picu Prietu y el Bufarán.Travieso Avilés fasta la estación del ALSA y dempués d’un cachu lleguen Isidro y Juanjo pa despidime. De Marife despidime a les 7’30 y espero que nun quede muy atristayada. Nun se, parezme que va tar permurnia los primeros dies. Igual que mió má. Cuando falten pocos minutos pa embarcar lleguen mió má y Tina. Una despedia allegre.Casi 7 hores y llego a Madrí. El viaxe ensín novedá. En Mieres del Camín subieron dos guineanes que sentaronse nel asientu tres de mió y nun pararon de falar fasta Madrid. En Madrid tan esperandome Xurde y Laura. Préstame velos porque esto a mi quédame muy grande y sientome fuera del mió llugar. Valeramente esperamos por Angel, que nun llegará fasta más de les 10 a casa Carmen.Ya’n casa Carmen salimos a tomar cerveces y picar daqué. Ceu colen Xurde y Laura pa Móstoles, a unos 40 km. de onde tamos (cada vegada toi más ablucau de les distancies que hay n’esti pueblu). Despidimonos d’ellos y noto en Xurde ganes d’apuntase a esti viaxe...¿quién nun les tendria?. Dempués, cuando llega Angel, falamos por primer vegada los tres, de lo que creyemos que nos espera’n Cuba.
15 de Febreru de 2000, Martes.
Entama la segunda parte del viaxe. Pela mañana, a les 10, vienen buscanos nuna furgoneta y vamos pa la TVE.Carmen remana una visita guiada peles istalaciones. Dempués una reunión col equipu p’aclariar dalgunes coses : la especial situación de Cuba, la burocracia, yaesu. Dempués, pa Barajas. Equí tan los vascos. Jabier, Gaizka, Jose Maria y Koldo. Tamién ta la otra xente de la tele que vien : Ricardo, productor, Mario, encargau de soniu, Toñín, el cámara, y l’encargau de les lluces, Pablo. En Cuba espéranos Mick Madden ya l’equipu cubanu.Dempués de 20 menutos de retrasu (ye Barajas) por fin embarcamos. Hay overbooking, asina que en vez de dir na clase turista vamos en clase bussines... ¡coñu cola clase bussines!
Carmen alcuerdame de Fanjul. De xuro que-y tocó nún avión borregueru. Nos disfrutamos d’atención combayona, de merienda, Chivas, cerveza, Greissy y tolo que pidamos de baberu, dellos canales de vídeo, musica, yaesu.Agora prefiero sentir a Dulce Pontes y la so “saudade”. De xuru que’n pocos dies atacarame la señaldá. Tocame dir na mesma filera d’asientos que Gaizka y Jabier, y un cachu vemos película (La Fia’l Xeneral, con John Travolta y Madeleine Stowe, que, como siempre, preciosa con esa guapura natural y fresca) y otru cachu falamos de Cuba. Bueno, Jabier fala poniéndome al corriente de lo que ye aquello y suxiere como la xente tien que portase colos cubanos. Parez ser un enamorau de Cuba y la so xente.La xente va espardia pelos asientos. Carmen y Angel van xuntos, los de la tele van xuntos y los vascos procuren xuntase. Solo yo soi’l raru y además el más nuevu n’estes coses de les expediciones a l’estranxeru. Considerome tamien dientro del equipu de merguyadores como el guah.e, ya que la mió esperiencia nun ye comparable a la de Carmen y Angel. Seis hores de vuelu. Media calderada cacharros y Bayles a discreción. Unos metros más a proa viaxa Compay Segundo, al que Josemari pidi-y un autografu. Dempués Josemari confunde la crema hidratante que dan nel avión con la pasta pa’l dentame. Un tipu curiosu esti Josemari.Por fin aterrizamos en La Bana. Foron 8 hores 50 menutos de vuelu intercontinental. Nel aeropuertu José Martí todo tomase con muncha calma...control de pasaporte, control de visa, espera, espera, espera y espera una hora fasta que salen los bultos. Fuera tan esperándonos la xente’l ICAIC. Dempués del liu de les presentaciones cargamos tolos bultos nún camión y a nos méten-nos en dos furgonetes y pa’l hotel. El salir de la terminal ye un autenticu ostiazu. Pasar del aire acondicionao al calor de la cai faime tomar conciencia de que por fin toi nel Caribe (fai algo más de 48 hores taba cruciando con barayones penriba el xelu del L.l.agu’l Val.l.e
Vaya pasada d’hotel! Cuartos inmensos y, además, “masaxe hidraúlicu”. Los xenerales nun tan bien como nos. Comparto la habitación con Koldo. Ye’l más reservau de los vascos y parez que siempre ta a la defensiva ¿posible escesu de negatividá nel RH?.
16 de Febreru de 2000, Miércoles, en Cuba.
Anuechi nun fuimos quien, nin Koldo nin yo, a prender el rollu del hidromasaxe, dempués de dar la primer vuelta per La Bana. La Bana Vieya ta separtada 10 km. del nuesu hotel. Chumamos un “mojito” en El Patio, al llau de la catedral de La Bana. La Bodeguita del Medio taba pesllada. Intentaremoslo otru dia. Dempués fuimos a un chiringitu de prietos al llau de El Malecón. Tou dios quier vendenos daqué...maria, puros, ron, neñes de 14 años que dicen-nos que tienen 27. Y tou dios ye descendiente d’astures, vascos y gallegos, magar que seyan prietos como zapatos. Pingueros de mierda.Tornamos pa’l hotel a les 2’30 hora cubana, 8’30 hora d’Asturies. A les 6 toi como si fueren les 12 la mañana. Por nun molestar a Koldo métome’n vater y, milagru, arranco’l rollu del hidromasaxe de la bañera. Ye una pasada. Que bien tienen que vivir los ricos. Y lo h.odido ye que yo tenga que probar esto nún pais del tercer mundu onde la xente pasa fame y l’estranxeru tien tolo que quiera.
A les 8’30 almuerzu y reunión. Entama’l trabayu, güei ya vamos filmar. Movémonos per La Bana pa dir a la gueta d’un Chevrolet descapotable colorau de los años 50. La idega ye filmar n’El Malecón a los “protas” pasiando n’esi carru. Entamamos na Plaza’l Capitoliu y cruciamos Prado fasta El Malecón. Delles tomes, qu’a mi parecenme cencielles, amuesen un poquiñin lo que ye’l ambiente de La Bana. La xente espera nos cruceros y los semáforos, que equí tan al otru llau del pasu, a que pase dalgún coche que nun te llenu y que los recoya.Inda nun tenemos permisu pa filmar en La Bana Vieya (Oooh,Caribe), asina que güei nun trabayamos más. Guetamos una paladar pa xintar pero o tan pesllaos o tan enllenos de xente. A la fin xintamos nuna tabierna, La Lluvia de Oro, u actúen un grupu de moces que toquen boleros y son cubano. Unes neñes siéntense con nos y convidamosles a xintar. Una d’elles péname la melota con trences como los negrais. Gaizka y yo damos dempués una vuelta pel mercau d’artesania y mercamos delles coses. Llueu pa’l hotel.A les 8 quedamos pa dir cenar. Jabier fala de dir a Playas del Este. Sigún elli, hay restaurantes y discoteques. Garramos dos taxis y vamos p’allá. Hay unos 20 km. dende’l nuesu hotel. Playas del Este ta valero. Solo atopamos una cafeteria onde dan-nos unos sándwich y delles cerveces. Ye increíble la bayura de cerveces que puedo beber equí ensín mamame...Aaah...Gronf. La discoteca ta desierta. Solo unos xubilaos alemanes tan tomando copes y berrando nel karaoke. Camentamos tornar pa La Bana. Toñin diz al taxista que nos lleve a un llocal con espectáculo y llueu llegamos al Cabaret Las Vegas. Namai entrar agarrase a caún de nos una muyer. Esto tienme muy mala pinta pero meyor qu'l Cancún de Prendes. Si tuviera equi Delri, diba-y prestar. Quiciabis ye que equí soi nueu, pero lo que nun se puede negar ye que como baxes la guardia enriendente y cayes como Felipón. De todes maneres algunos güeyos remembrenme otros güeyos d’orbayu, güeyos que me trayen l’alcordanza del verde del mio pais y l’oscuro de les biesques. Vemos y damos un grande espectáculo. Ye, cuantu menos, llamativa la manera de baillar de les moces d’equí. Arrimense muncho y restrieguen el culu contra la punta de los paisanos. Vese que más d’unu garra un calentón. Dos de los vascos marchen con unes moces y el restu quedamos viendo el “show”. Pasa una hora y les cubanes ya pasen d’entrame...
Oye, tu sabes, mi amol. Yo me voy a sacrificá, porque con esos oh.os vas a matar a todas las mulatas de La Habana. Toles que m’arrodien decátense por fin que nun quiero más que chumar una cerveza tres otra a ver si paro de sudar. De sutrucu, una sientase na mesa y dizme si la puedo acompagar
.-Por favor, señol. Uno de sus amigos esta muy bebido y está escandalisando a los vesinos. Puede venir la polisia.Camento qu’un de los vascos debe tar armándola. Busco cola mirada al restu la banda, pero unos tan baillando na pista y los otros colaron. Llevántome y salgo del llocal. La moza nun ye muy alta, delgada, pesará unos 50 kg y tien el pelo llargo y rizao. Por supuesto, ye mulata. Nun veo al vascu fuera’l llocal y ella echa a andar pela cai. Cuando ve que nun la sigo, espérame y dizme que’l follón ye n’una casa cercana. Caleyamos per calles oscures y pídeme que la garre pelos costazos.
Si nos para la policia –dizme-
di-yos que somos novios. Camento que por qué nos tien de parar la policia, y de sutrucu, un pensamientu surde na mio tiesta: ¿que faigo yo caleyando pela nuechi per una calle prieta como boca llobu, n’una ciudá que nun conozco, agarrau a una mulata y cruciandonos con negros a los que nun veo hasta que nun tan al mió llau. Una corriente de llerza percorreme dende los pelos fasta los pies. Por suerte, la mano que tengo llibre ye la mandrecha y al metela nel bolsiellu palpio la taramundi. Nun se si valdrá pa dalgo pero tranquilizame. Por fin llegamos al portal de la casa. Una bombiella nel primer descansu fraña l’escuridá. Dende equí sientense les voces. Cuando llegamos al segundu pisu alcuentrome con Gaizka sentau na escalera, tien una moña d’espatarrar y nun ye capaz d’amarrase les chancles. Da voces y una muyer mayor y otra moza intenten calmalu. Farfuya nun se que de quedase a dormir ellí pero les muyeres esplíquenme que polo que pagó solo tien drechu a como munchu una hora y esa ya pasó. Axudolu a llevantase y mira pa mi con cara bobu. Nun me reconoz y estraña-y que nun seya vascu. Cargo con el, pido disculpes y llevolu otra vegada pa’l cabaré. Les mulates acompánguen-nos y asina dexen-nos entrar los goriles de la puerte.A les 2’30 dalgunos tornamos al Hotel Miramar. Otros llegarán pela mañana.
17 de Febreru de 2000, Xueves.
Esconsono a les 7’30. Jabier dormió esta nueche comigo en cuenta de Koldo. Esti quedose per ehí con una prieta. Falome Jabier de lo que vamos alcontrar na selva. Ye un sitiu abegosu polo que cuenta. Ñubes de mosquitos pa los que nun val el repelente (sigún elli,el repelente atrailos más, ye piensu pa los mosquitos), cueves muy téuniques, llargues aprosimaciones, cagaleres, posible disenteria y unos paxarones que tresmiten la tiña. Les cueves tan llenes d’arañes enormes, culiebres y sapos velenosos. Eso sí, los sifones son d’agua llimpio y claro. En fín, lo que puede esperase d’una espedición de Al Filo de lo Imposible.
A les 8 llega Koldo y a les 8’30 llega una tremenda mulata encesa reclamando-y 50 dolares USA. Koldo ye rápidu como una culiebra y sácala de la receución enantes de qu’ella monte un barullu. Ya crei que diba ver una escena de película cubana ...¿o quiciabis la realidá equí ye asina, como cuenta el falleciu Gutierrez Alea?
Salimos pa Pinar del Rio. El camín ye una autopista de tres carriles pela que cuerren toa triba de vehículos y a la velocidá que-yos da polos coyones...Gua-guas, chevrolet y cadillac de los 50, skodas, ladas y moskovitz enllenos de xente, enormes camiones rusos, bicicletes chines y carros tiraos por machos y burrinos mécense fasta nos arcenes. Adelanten per cualquier llau y cambien de sentiu cuando-yos peta. La mediana simplemente ye un prau enfondigonau en donde delles vegaes enbanzase l’agua.
Pinchamos, parez un tópicu pero cualisquier viaxe en Cuba un pocu llargu tien que tener un par de pinchazos polo menos. “Ponchar” dicen ellos y vese que ye frecuente porque cada poco atopamos chaboles que quieren ser talleres de reparación de ruedes. Pa cambiar la nuesa rueda para tola espedición...la otra furgoneta, el camión del material, la camioneta rusa, el coche del productor y el coche del ICAIC. Notase la heriencia española: solo un paisanu trabaya y el restu miramos y damos-y idegues de como lo tien que facer (somos alredor de 20 persones). Por fin seguimos y mientes nos averamos a Pinar del Rio van amuesándonos la Sierra del Rosario y, allá lloñe, los mogotes de la Sierra de los Organos.
Pinar del Rio ye una ciudá grande, con cases baxes. Camento que tendrá alredor de 80.000 veceros. Equí faense delles tomes del encuentru colos espeleos cubanos y caleyando peles cais. Dempués comemos nuna “piseria”. Les “pises” equí son un tortu doblau pela metá y rellenu de quesu fundíu. Acompangolo de delles cerveces coles qu’intento llibrame de la deshidratación que parez que me disolve per dientro. La calor al mediudia pesa como una llávana ferviente incluso fasta na solombra de les cais. Muches d’estes cais tienen guapos soportales nes cases d’estilu que nos–y dicimos n’Asturies d’indianos. La pena ye que, asina como n’Asturies intentase conservales en bones condiciones, equi la situación del pais fai que munches d’estes cases ten cayendo lliteralmente, magar que la xente inda viva n’elles. A pesar d’esto Pinar del Rio parezme guapo. Por supuestu, mientres comemos vuelven a ufiertanos puros, ron y muyeres a bon preciu. Ta bien sabelo.Una hora de viaxe llévanos hasta’l Mirador de Viñales, xunto al Hotel Los Jazmines. Esti llugar remana tol Valle de Viñales, un gran “poljé”, un fuexu de delles decenes de kilómetros ú dexense ver tolos acidentes del pais cársticu. La llanada’l fondu ta llerada de plantaciones de café, yuca, maiz y tabacu, que tien la fama de ser el meyor de Cuba. Toñín y Mick faen delles tomes dende’l mirador y colamos pa’l hotel onde vamos dormir güei, el Rancho San Vicente. Ye una campera na biesca ocupada per cabañines y altes y esbeltes palmeres. Un llugar peragradable y que además, nun se onde, tien una piscina termal. Bañámonos n’una piscina pero que ta igual de caliente que’l restu de coses que l’arrodia. La estrada que vien fasta equí culebrea ente los mogotes. Estes formaciones tienen les sos paredes con abondes formes de cavernamientu y munches vegaes, la roca ta tapecia pel trupu biescu. De toles partes surden veneros d’agua que, dempués de ciertu percorriu, desumense embaxe de les paredes.
Pasamos al llau de “La Cueva del Indio”, una cueva turística onde paseen a la xente n’una chalana per un llagu.Dalgunos vamos cenar a un bohiu averau. Bona cena...llagosta, yuca, malanga y ensalada, cerveza pa chumar y ron de casa pa’l que lo quiera por 10 dolares (unes 1.700 pts.) Hai un intentu de baxar a Pinar del Rio de comedia, pero la nuechi anterior pesa y a la fin tol mundu decide quedase nel hotel. Los vascos que conocen la fastera dicen que desprovechamos la cabera nueche na civilización y que tardaremos más d’un mes en ver cualquier cosa agradable que nun seya un platu arroz. ¡Oh, madre! ¿Onde me lleven?
18 de Febreru de 2000, Vienres.
Salimos a les 11 otra vegada’n direición a Viñales. Filmense delles tomes pel “poljé” y llueu llegamos a Pons, otru pueblín del valle pero más pequeñu y más probe que Viñales. Dende equí entama una pista de 15 km. hasta Pan de Azucar. Esti llugar ta’l final del valle y son delles casines espardides pela llanada. Recibe el nome d’un mogote calterísticu que remembra un poquitín, chando-y imaxinación, al Pao d’Açucar de Rio de Janeiro.
Les cases son d’una sola planta, paredes de tabla y teyau vexetal. Nun tienen elletricidá nin agua corriente, polo que n’esti aspéutu, les condiciones de vida de los veceros tan más averaes al siglu XIX qu’al XXI . Vense munches tierres plantaes de yuca, maiz, tabacu y malanga y dalgunes “vaques cheposes”...Bueno, cebús vietnamites propiedá del estau. La Casa’l Mélicu nótase que foi fecha cola idega de dar serviciu a esta grande fastera rural, pero güei, coles restriciones que hay, tien un aspéutu perprobe. Tien una ambulancia aparcada delantre, pero polo que me cuenten ta inservible por falta recambios y gasolina.
Los cubanos dicen-nos que tiremos les llates vacies pela ventana de la furgoneta. Aprovechenles la xente que vive nes cercanies de la carretera. Esti ye’l pais onde toó se recicla, y mas n’esta fastera.
La cabera casa’l llugar ye la de Angel Miranda “Coco”, un “guajiro” qu’entamó a facer espeleo colos vascos en campañes anteriores. Y ye equí fasta onde lleguen los carros a motor.
Tola familia Miranda sal a recibinos. Parecen tener un calter peragradable y noble. Fílmase la llegada, la descarga’l camión y la carga n’un carru tirau per gües. Lo que equí llamen gües son, como dicia enantes, cebús vietnamites. Vaques con chepa y cuernos gordos pero parez qu’afaitaos a serruchu.Entamamos a dar viaxes y montar el campamentu, llabor que llevanos tola tarde y les primeres hores d’escuridá. El comedor móntase nuna teyavana fecha de palma preparau con una mesa y un bidón que fai de cocina. Toles comides van facese a lleña.
Tres la cena hay un poco sobremesa pero ensín alcohol, y esto llevanta delles protestes. Mañán trayerán cerveza y ron. Jabier Les, el cabezaleru la espedición amuesame la surdencia averada al campamentu. L’agua nun se ve muy nidia pero tendré que velo a la lluz del dia pa faceme una idega de la visibilidá.
19 de Febreru de 2000, Sábadu.
Siguen los llabores de organización del campamentu. Angel y yo facemos un tendalón y al dir a la gueta madera pa los puntales chamos-y otra güeyada a la surdencia. Magar que Jabier dixome que nun tien nome conociu, los guajiros nómenla el Nacimiento del Rio Cimarrones. L’agua ye veyao, agora ya nun hay dubia. Ye un agua verde que nun dexa ver más alló d’un metru.
Preparamos el material d’espeleo de los téunicos de TVE y los vascos istalen dos paredes pa enseñalos a movese peles cuerdes. Les istalaciones nun son tan bones como deberien, asina que ameyoramosles. Los rapazos del equipu téunicu garren bien l’asuntu de la SRT. Les paredes tan na llende de la biesca coles tierres de tabaco y podemos atechanos de l’agua d’una nubuca. Esti agua espanta los pocos mosquitos que hay. Por suerte, esto nun ye como nos contaron, los mosquitos casi nun piquen y además hay pocos a lo llargo del dia. Esto ye bono.Les caberes hores de la tarde gastámosles preparando material de merguyu. Hay que camudar les abrazaderes porque les botelles de 12 ll. que trayen los cubanos tienen el diámetru de les botelles de 15 ll.
Hay un pequeñu roce colos vascos porque nun yos prestó que camudáramos la istalación de les paredes, pero n’esta triba de roca nun puede haber ningún contáutu cola cuerda. Además, dos cuerdes nun tienen más que una manera d’empatase.
Tres la cena, güei hay reunión con ron pa organizar lo de mañana.
20 de Febreru de 2000, Domingu.
Entamamos a preparar el material pa merguyar. Güei entraremos en Cueva Chiquita (los vascos empeñense en rexistrala como Cueva Txiquita, ye nidio que siempre tien que aparecer el síndrome Hernán Cortés). Nun parez que tengan munchu respetu pela toponimia llocal. L’oxetivu ye que la xente de la tele tenga un primer contautu col mediu soterrañu.
Cueva Chiquita ye una surdencia temporiega, pero que cuando xorrez da’n reventón. Les primeres galeries tan abiertes con una resquiebra nidia más alta que ancha. nel techu vense maderos y basa, y decatámonos del nivel qu’algama l’agua n’estes galeries. Darreu llegamos a una saluca que ye l’entamu d’una serie de sales más grandes xunies per gateres cómodes. Hay delles esguiladines fáciles istalaes con cuerda. La única torga más suñilable ye un pocín de 10 m. escosos enantes del sifón. La galería que s’empobina al sifón ta llerada de montones de basa de dellos metros d’altor. El caudal de agua ye pequeñu y el acesu al sifón entama nun llaminador col suelu de basa. Dempués de 20 m. d’arrastrase llegamos Carmen y yo a la poza. Enantes que l’agua se veye del tóo vemos una galeria somorguiada que parez pasable. L’agua fiede y suelta burbuyes de grisú, tantes que nos fai creyer que’l riu ta xorreciendo. Salimos siguiendo’l calce’l riu y vemos abondes piles de basa fedionda.Ya fuera hay otra enganchada colos vascos pola mor d’un cámbeu nún pasamanielles. Tan istalando los anclaxes con torniellos espetaos a martillazos na roca, una téunica que nos abandonamos nos primeros años 80. Usen esto magar que-y encargaron a TVE una caxa d’espits y otra de parabolts.. ye llamativo, cuanto menos. Vamos de cabeza’l riu pa quitar el fedor de la cueva. De toles maneres, nun ye que l’agua del riu seya muncho más llimpio. Dempués cena y reunión. Los vascos quieren dexar nidio que son espeleólogos d’altu nivel y que usen eses téuniques per una visión ecoloxista y revolucionaria de la espeleoloxia. Yo nun digo nada, pa eso son los mocinos de la película.
21 de Febreru de 2000, Llunes.
Güei vamos entamar a merguyar. Carretamos material d’allumar hasta la boca de Cueva Grande. Dempués Carmen cha-y una güeyada al sifón de la naciente’l riu. L’agua ye veyao enantes de metese. Esplora 30 m. fasta 15 m. de fondura per una galería cómoda ensin ver un res. Demientres Ramón y yo (Ramón ye un merguyador cubanu que quier deprender daqué d’espeleomerguyo, oficial de la Fuerza Aerea Cubana ya istructor CMAS) alcontramos un sifón na entrada de la Cueva de la Jaiba. Nun ye muncho meyor que’l primeru pero Carmen avanza 60 m. de llargor a 10 m. de fondura.Pela tarde terminamos d’iguar el material d’espeleomerguyo. Mañán vamos entrar Angel y yo a topografiar los sifones. De nueche, tres la cena, folixa guitarrera y son cubanu. Vien un paisanu a tocar y cantar que tocó con el Trio Baracoa, que dicen que ye muy famosu. Cuando vuelva a Asturies tengo d’entruga-y a Isidro a ver si los conoz. Jabier, Koldo y Gaizka toquen los bongos y nun suena mal. Jabier toca n’un grupu de rock radical vascu y sabe facer ruido y cantar con voz de muertu. Tien munches habilidaes esti rapaz....mira-ylu, ho, hasta sabe grabar discos.
22 de Febreru de 2000, Martes.
Güei el equipu de filmación tien que llegar a los llagos de Cueva Grande. Los vascos continuarán dempués la istalación de la cavidá.Anuechi decateme del montaxe que ye esto. Camento que los cubanos viven de vender (entre otres coses) la esploración d’estes cueves siempre como nueves. Per equí ya pasaron madrilanos, valencianos, los ingleses d’Oxford, con James Hooper a la cabeza y esta banda de pantasmes que son los vascos. Por ciertu, Hooper tuvo en La Bana una actuación asemeyada a la que fizo nel Llagar Sampedru, pero esta vegada con una tremenda negra.Nos vamos merguyar nos sifones d’ayeri. Axudanos Ramón, que ye pilotu d’aviones de combate ya istructor CMAS. Güei tócame a mi merguyar nel Nacimiento del Rio Cimarrones. La visibilidá ye casi ñula a la entrada. Istalo y topografio fasta la marca de 70 m. de llargor y 18,6 de fondura. Equí l’agua véyase del tóo y algamo lo que parez un culu de sacu. Salgo y dempués d’un cachu torno otra vegada a intentalo a ver si aclarió l’agua, pero nun puedo compensar. Angel métese nel sifón de la Cueva de la Jaiba. Anda 100 m. per una galeria amplia con poca visibilidá a 10 m. de fondura de media. Perbaxu camenta que hay una galería más grande pero nun ye a ve-y les paredes. La visibilidá ye daqué meyor que nel naciente del riu. Tamién topografia.Dempués nel campamentu, decatámonos que un sifón va penriba l’otru. Además, como Ramón y yo topografiamos el calce esterior pa que valiera de referencia, decatámonos tamién que les galeries somorguiaes empobinense a Cueva Grande. Mañan podriase topografiar la parede’l mogote dende la Cueva la Jaiba fasta Cueva Grande. A les 17’30 lleguen los vascos ensín terminar d’istalar Cueva Grande...¿qué tendrá esa cueva?... Tres la cena suelten allegremente que-y vendieron una moto a la TVE...Bien.
23 de Febreru de 2000, Miercolés.
Continua la filmación en Cueva Grande. Nos pasamos tola mañana marcando 400 m. de filo guia. La idega ye que Carmen entre pel sifón de la Cueva la Jaiba y Angel pel Nacimiento del Rio Cimarrones, a ver si contauten. Angel lleva un pitu somorguiable. Dempués de 34 menutos d’inmersión Carmen siente el bocinazu pero nun ve a Angel. Pela so parte, esti avanza a testerazos fasta quedase atorau nún llaminador. Ye nidio que les galeries tan empataes pero la veyura de l’agua torga l’avance.L’equipu de filmación salió a les 4 hores de entrar (ye la autonomia de les bateries de los focos). L’acesu al sifón de Cueva Grande sigue ensín tar istalau. Na tertulia tres la cena decátome que dalgunos cubanos tan adulces tracamundiaos cola tema basca.
24 de Febreru de 2000, Xueves.
Güei vamos a atacar el sifón de Cueva Grande...¡Por fin!. Tenemos que istalar además un pozu que, según los vascos, ye perdificil de montar. Dicen que puede ser una istalación pertéunica. Ya tamos dixebraos del tóo del equipu de filmación. Les botelles de 12 ll. tan escoses y vamos a entrar a echa-y una güeyada con una botella de 6 ll. a 150 bar.
Entramos na cueva a les 11’45 dempués d’igüar tolos preseos. Ye una entradona grande seguia de galeries de grande volume. Darreu llegamos al primer llagu. Carmen tien que nalalu pa dir a la gueta’l chalanu. El llagu tien alredor de 100 m.. Tres d’elli una llomba de sable separtalu del segundu llagu, esti un pocu más cortu. Llueu entama la “terrible y abegosa Galeria de los Dientes de Perro”. Ye un cortu cachu de galeria con poces seques en suelu que parecen formaes por grandes goteos, pero na que nun vieramos n’otres cueves de cualquier llau. Equí atopámonos col equipu de filmación, que aprovecha pa facer una toma con nos. Dempués seguimos pa’l sifón con Wladimir Otero. Hasta’l sifón queden unos 400 m. de distancia ya istalar un pocín de 8 m. de fondura per una colada. Ponemos una escala y asina resolvemos el tremendu problema téunicu de la istalación. Llueu el xeitu la cueva camúdase. La roca ye agora prieta y con abondos resclavos d’actividá fuerte d’agua. Toda esta fastera de la cueva ta ocupada per grandes ensames d’esperteyos. Ye tal el barullu que armen que parez que tamos a verándonos a un riu xorreciu. Otru llagu, esti más pequeñu y ocupau en parte per una llomba de sable sepártanos del sifón. Esti ta nel fondu d’una rampla de barru y sable compactao. Ye un grande llagu ú hay qu’andar a la gueta la galeria. Cerca de la oriella veo un peix que s’arima a les nueses lluces. Esto fainos abellugar bones esperances de que puede haber un camin haza los sumidorios cimeros.Nalo pela superficie dando una vuelta alredor del llagu y alcuentro una galeria. Parez grande y franca y la veyura del agua ye asemeyada al Güeyu Deva. Entama a 3 m. de fondura y sigue nortiada a 150 º N. Monto un fraccionamientu y dexo’l carrete pa mañana. Parez que por fin dimos con daqué guapu. Llegamos al campamentu a les 17’30.
L’horariu de vida nel campamentu ye pertranquilu. Esconsono tolos dies a les 7 ó 7’30 cola lluz del sol. Plumio nel diariu lo qu’asocedió’l dia pasau. A les 8 almorzamos...pan con dulce, quesu, güevos revueltos con tomate, arroz de la nueche cabera y un café perfuerte que desigua l’estómadu pa tola mañana. A les 9 l’equipu de filmación cola pa Cueva Grande y nos, los espeleomerguyadores arranchamos el nuestru material. La nuestra organización ye’l sistema tan frecuente ente los espeleomerguyadores asturianos“perru come perru”. Esto ye, cada espeleomerguyador igua’l so material y prepara’l so somorgamientu, magar que los otros dos tamien andechen dafechu. La xera de filmación fina a les 14’00, ya que tan llimitaos pela autonomía de les bateries de los focos. Nos entamamos les esploraciones alredor de les 12 y enxamas finamos enantes de les 18 hores. Dempués tócanos volver a iguar el material, asina que nun paramos de trabayar fasta les 20’30, hora na que cenamos. Por supuestu, los vascos encuantu salen de la cueva desparecen.
La comida preparenla dos persones: Omar, un rapaz enforma tímidu y que dalgunos d’equí dicen que ye manfloritu, y Xiomara, la moza de Wladimir. La verdá ye que trabayen enforma y tan algamando que la xente te contento cola comida, magar que tienen que cocinar con fueu de lleña. Esto fai que tengan que llevantase a les 6 de la mañana pa iguar los almuerzos. Podria evitase si tuvieren una cocina de gas, pero Jabier, home sigún el mesmu avezau a organizar espediciones al estranxeru (Burgos, Llogroñu, Ramales, yaesu), nun contó con esta menudencia... En fin.
El restu’l personal cubanu ye perestremao. Todos son universitarios con una formación pergrande. Xeólogos, historiadores, químicos, físicos y hasta un pilotu de Mig.
25 de Febreru de 2000, Vienres.
Carretamos el restu’l mió material y tol material d’Angel hasta’l sifón ente Carmen, Angel, Ramón y yo...xatada. Equípome n’una repisa colos pies sapozaos na repla. Nalo fasta la otra oriella y somorguiome. La visibilidá nun ta mal y esta vegada llevo un focu amarrau al brazu drechu. Nótase la diferencia. Garro’l ril y avanzo pero a los 20 m. de llinia llego a una parede. Xubo y baxo pela canal pero nun hay salida. Torno recoyendo filo y avanzo pela manzorga a la gueta d’otra galería. Alcuentro otra y parez que tira, pero dempués de dellos metros zárrase n’una canal. Dexome dir al fondu y el sable xuntase cola parede. Subo y l’aladín chifla porque avérome a la superficie. Decátome que toi metiu nún tubu de presión y al pocu fraño la quietú d’una campana. Esto ye’l fondu d’un pozu de paredes verticales. Siento voces y ye que Angel ta esplorando unes galeries cimeres y acolumbró’l rellumu de les mios lluces. Amarro’l filo y dexome cayer na nube marrón que tapez el camín de vuelta. Al entamu nun hay visibilidá dala pero de sutrucu vuelvo a ver la parede. Sigo’l filo y decátome que fice dellos tornos pela galería. Agora toi nel llagu otra vegada (toi casi convenciu que equí nun hay sifón) y avanzo dexando la parede a la mandrecha fasta surdir na superficie cerca d’onde m’espera Carmen. Tol fondu ta ocupau pel sable que baxa’n rampla fasta la parede. Dempués miro l’otru estremu de la parede fasta que zarro’l circulu. Agora ya nun hay dubia...ye un llagu. Angel y Wladimir tornen diciendo que la cueva sigue per una galería cimera onde hay qu’esguilar una chimenea. Esto ya ye cosa de los vascos.
Salimos al esterior dexando’l mió material ya que nos prósimos dies hay que rodar la inmersión. Angel y Wladimir baxen al riu y alcuentren una galería que’l cubanu nun conoz y qu’empobinase riu arria. Esto coméntase fuera y naide, nin cubanos nin vascos decátense de lo que dicen Angel y Wladimir. La galería ye grande y hay que nalar enforma. Puede ser una nueva galería, pero ¿tan nidia y ensín mirar per naide? Abultame raro.
26 de Febreru de 2000, Sábadu.
Güei los mocinos somos nos. Van filmanos entrando nos sifones del Naciente del Rio Cimarrones y de la Cueva de la Jaiba. Bien, ye trebeyoso porque hay que repetir delles vegaes les tomes.Un equipu d’esploradores entra na Cueva Grande y confirma que la galería del riu ya ta esplorada pelos ingleses. Pareciame raro que James Hooper y la so xente dexaren pasar una galería asina. Esto faime pensar si los sifones nun tarán ya esploraos pelos ingleses. Evelio asegura que non. La galería en cuestión empobináse en realidá riu abaxu hasta mecese cola principal al altor del segundu llagu.
Güei pela tarde arréglase tol mundu. Carmen, Angel, Lourdes, Evelio,Ramón, Aldo, Mick y yo colamos pa Puerto Esperanza a fartanos de llangosta. Al restu la tropa, baxu’l mandu de Ricardo, van venir buscala nún camión pa llevalos a la discoteca a Pons. Na discoteca ya ta puestu, dende fai dellos dies, un cartelu avisando a les muyeres de la rodiada que’l sábadu pela nueche baxarán los espeleólogos de Pan de Azucar. Esto ye verdá.
Nos fartámonos de llangosta por 32 $ por cabeza...pero fartase fartase. A la vuelta paramos en Pons a ver el ganao que baxó de Pan de Azucar. La discoteca ye un tendeyón con dos bombielles, una bolona de rellumos nel techu y un equipu música. La entrada cuestanos 2 pesos por barba y dientru ta tola banda agarraos a neñes, la mayor aparenta 17 años, por muncho que digan que tienen 25. Les moñes son d’agarrase. Nos tomamos un vasu, mercamos una botella ron y vamos al campamentu. Ellí tamos charrando fasta la 1 la mañana.
27 de Febreru de 2000, Domingu.
Nun se a que hora llegó’l camión de los folixeros, pero güei les cares son de funeral. Menos mal que’l plan pa güei ye cenciellu. Vamos repetir les tomes de la marcha hasta los sifones. Escoyemos otru camín pela biesca pero el sol nun para de tapecese tres les nubes, asina que dexámoslo pa otru dia. Grábase tamién como marcamos el filo. Dempués Carmen y Mick somorguiense na Cueva la Jaiba pa filmar dellos minutos somorguiaos. A les 5 de la tarde fínense tolos llabores. Tres la cena dalgunos colen nel camión pa la discoteca y otros quedamos de charra animao fasta les 12.La llista de xente que tamos equí ye:
Jabier Les.- Cabezaleru de la espedición, espeleólogu vascu.
Jose Maria Zuazua.- Espeleólogu vascu.
Gaizka Carretero.- Espeleólogu vascu.
Koldo Gonzalez.- Espeleólogu vascu, lleva dos dies despareciu con una neña de 15 años.
Angel Ortego.- Espeleomerguyador del Grupo Espeleológico Mediterraneo.
Carmen Portilla.- Espeleomerguyadora del Grupo Espeleológico Mediterraneo y cordinadora oficiosa de tóo.
Aldo.- Xofér del ICAIC.
Ramón.- Xofér del ICAIC.
Evelio Balado.- Espeleólogu y xeólogu cubanu con más de 25 años d’esperiencia en Pan de Azucar. Ye una persona peragradable y además collaciu de Julio Valdés. Pertenez al G.E. Martel de La Bana.
Baseiro.- Espeleólogu cubanu del C.E. Pinar del Rio.
Angel Miranda, Coco.- Espeleólogu cubanu del C.E. Pinar del Rio.
Wladimir Otero.- Espeleólogu cubanu del G.E. Martel.
Xiomara Mariño.- Espeleóloga cubana del G.E. Martel.
Ramón.- Merguyador cubanu, muy trabayador.
Ricardo Gonzalez.- Productor de TVE, va de cultu y escritor. Dormir n’una tienda de campaña ye l’aventura de la so vida. Parez que s’escapó d’un escaparate de Coronel Tapioca.
Mario.- Téunicu de sonidu de TVE.Pablo.- Téunicu de lluces de TVE. Un curiosu.
Antonio Perez Grueso,”Toñín”.- Cámara y direútor de fotografia de Al Filo.
Mick Madden.- Dicen d’el que ye un de los meyores espeleomerguyadores del mundu. Ye’l cabezaleru de les esploraciones de Nohoch en Yucatán (más de 70 km. de galeries somorguiaes. El so trabayu equí ye d’axundante de Toñín.
28 de Febreru de 2000, Lunes.
Güei entramos todos a Cueva Grande. Hay que filmar la llegada y la esploración del llagu y tamién parte de les galeries actives. Tó faise ensin problemes. Salimos carretando tamién el mió material de merguyu, que quedara nel llagu l’otru dia. Llegamos fuera a les 17’00 y dedicamos la tarde a llavar el material. La xente nun merguyadora queden tiraos pel prau y les tiendes argayaos dafechu. Nun aguantarien un asaltu d’espeleo de verdá.
De nuechi, otra animada tertulia dempués de cenar. Falo con Evelio de mitoloxia céltica, de El Señor de los Aniellos y del neolíticu atlanticu en xeneral. Esto llévanos a la mitoloxia cubana. Esplícame qu’esta tien dos orixenes: l’orixe taínu y l’orixe africanu, magar qu’anguañu ye dificil estremalos. Nes cueves cubanes vive’l Güise, un nanu prietu que dedícase a reise de los que caleyen pela biesca. Tien el pelo llargo y nun ye malu. Nes cueves nes que xurde agua ta la Madre de Agua. Esta ye una serpiente, concretamente una boa que, cuando se fai vieya, métese a vivir nes fuentes y cueves con agua y dende ellí llama a la xente a que vaya ellí a garrar agua. Esto faime pensar en los cuélebres astures. Quiziabis cuando se faen vieyos nun esnalen a la Mar Cuayada sinon que crucien l’Atlanticu fasta Cuba pa disfrutar de la so xubilación. Ye una bona idega de cara al futuru.Volviendo a la mitoloxia cubana, ta per otra parte’l sincretismu cubanu, la superposición de les relixiones africanes col catolicismu, pero esto hay que tenelo en cuenta namai como usu de les cueves como centros relixiosos.
29 de Febreru de 2000, Martes.
Terminó la filmación en Cueva Grande. Carmen y yo topografiamos el contornu del mogote ente Cueva la Jaiba y Cueva Grande. Esto val pa ver que’l sifón de la Cueva la Jaiba va’n direición al segundu llagu de Cueva Grande pero 18 m. perbaxu’l nivel de la cueva.
Dempués de salir de la cueva los vascos y los téunicos de TVE intenten montar follón porque tienen fame y nun-yos peta lo ufierten na cocina. Angel va dellos dies que diz que equí va armase. A mi nun me parez que seya pa tanto, pero el dia 12 de Marzu cola Toñín y Carmen tendrá que poner orde a esta xentecaya.
Pela tarde grábense delles escenes d’esteriores trabayando con planos y aldericando so los oxetivos de la espedición. Cena, tertulia, yaesu. Magar que ya ye costume de dalgunos colar de puterio toles nueches. Nueche tebergana güei...perros, gallos y xente enfilao pel campamentu. A les 5 y media la mañana siento ruiu de mosquetones na tienda almacén y tírome fuera con un focu y un palu, dispuestu a llevame per delantre cualisquier cosa de dos pates que se ximielgue.... Por suerte, pa el, el barullu t’armándolu Josemari, que chumó más de 2 llitros d’aguardiente de caña y anda dando tumbos pel campamentu. Tamién s’armo más sero cuando llegaron los puteros.
1 de Marzu de 2000, Miércoles.
Pela mañana entama la filmación en Cueva Chiquita. Angel y yo vamos sofitar a Carmen, que va somorguiase nel sifón de la Cueva la Jaiba. Tres 58 minutos d’inmersión solo consigue avanzar 30 más dica empotrase n’una resquiebra. Nun hay visibilidá dala.
Pela tarde preparamos un equipu pa dir agüeyar el sifón d’una cueva del Hoyo de los Cimarrones. Cuenten que l’aprosimación ye tremenda, más de 4 hores per tarren abegosu y naide quier venir a indicanos cuala ye la cueva con posibilidaes d’esploración. Tan mal nos lo ponen que preparamos equipu de vicac y comida y agua pa tres dies. La xente que vuelve de Cueva Chiquita torna argayada...probes.
2 de Marzu de 2000, Xueves.
Quedáramos con Coco pa salir a les 7 la mañana pero nun aparez fasta les 7’45. Wladimir dizme que equí hay qu’aplica-y a tolos horarios el fautor de tropicalidá. Carmen nun vien con nos. Nun s’alcuentra bien y quier más quedase a descansar. Nos, en 40 minutos algamamos l’altu la llomba nomada el Collado del Mamón, a unos 200 m. de desnivel. Cuando nos falaben d’esti collau yera como si s’alcordaren del Collau Norte del Everest...en fin. Tres d’esta llomba abrese’l Hoyo de la Fruta, una gran fondigonada cubierta de biesca y ocupada por abondos gochos que arrodiamos pa ganar otra llomba y dexanos cayer al Hoyo de los Cimarrones. Con calma, falando y sacando semeyes algamamos les cueves en 1 hora y 45 minutos. Nun habia nubes de mosquitos caníbales, nin culiebres devoradores de homes, nin collaos inalgamables nin selves trupes...una pena... Nun se que aventura vamos cuntiar.Vemos la entrada de Cueva Palmarito, un gran cuevón que fai de surdencia n’epoca de lluvies y dende onde corre’l Rio de los Cimarrones. Agora ta ensuchu pero’l calce que vemos ye ablucante. Más de 8 m. d’anchor y 2 ó 3 de fondura. Pues esta seición nun ye suficiente. Cuando xorrez inúndase’l valle enteru y los guajiros tienen que sacar d’ellí los animales. El Hoyo de los Cimarrones tien más d’un kilómetru d’ancho per otru de llargo que fina n’una foz. N’esti llugar resistieron tapecios un palenque de negros fugaos de les plantaciones fasta que fueron denunciaos per un traidor. Na foz atópense les cueves que furrulen de sumidorios.
Les dos primeres que vemos camudaron cola xorrecia cabera la so morfoloxia. Hay delles galeries que tan lleraes de sable y dalgunes zones inundaes tan enllenes de madera y materia orgánica en descomposición.La cueva que nos interesa ye la marcada como CI-5. La entrada ye grande y siguela una galería d’amplies proporciones, que dempués de percorrela durante 300 m. xira darreu a la manzorga y faise inda más grande, con una seición de más de 10 m. de diámetru. La galería sigue asina más de 300 m. fasta llegar al sifón. Tola galería tien enormes piles de basa y madera.
El sifón ta precediu d’un charcu d’agua fedionda y una esguilada. Nun vemos nidio que valga pa daqué merguyar equí, magar que Angel quier polo menos metese con un par de botelles. Dempués de xintar tornamos a Pan de Azucar. La vuelta facemosla’n hora y media. Nel campamentu, Carmen ya ta meyor.
3 de Marzu de 2000, Vienres.
Fai dellos dies Angel y yo hebiamos apuntao la idega de que quiciabis a los llagos del final de Cueva Grande llegara una galeria somorguiada. Esta idega apropienla Jabier y Mick y proponenla. Como merguyadores aceutamosla pero nun nos gusta que nos organicen el trabayu. Yo camento que onde hay que merguyar ye nel llagu caberu o nes sos cercanies pero equí planteguen merguyar a lo llargo de más de 500 m. de riu. Entamamos nel primer llagu. Carmen y yo merguyamos y Angel axúdanos col material. L’agua ye veyao y fediondo. Nun vemos les manes al separtales del cuerpu. Asina andamos una hora alcontrando delles resquiebres y viseres que nun van a nengún llau. El fondu ta a 8 m. de fondura llerau de sable. Cuando a la fin pescanciamos que ye una perda de tiempu dexamoslo y salimos.
A les 5 finen tolos trabayos. Mañán sedrá dia de descansu y caún aprovecharalo como-y pete.
Carmen, Angel, Toñín y yo, xunto con Evelio, Ramón, Lourdes y Aldo vamos dir a La Guabina, una casa’n mediu’n llagu, pa dormir ellí y dempués continuar a La Coloma, un puertu de la costa sur de Pinar del Rio d’onde saldremos a merguyar a los Cayos de San Felipe.En La Guabina por fin catamos una ducha dempués de quince dies llavándonos nes agües fediondes del Rio de los Cimarrones, onde compartimos la poza de bañase colos gochos y los cebús. Cenamos como señores, sentaos a una mesa y con platos que nun son d’aluminiu. Demientres cenamos toca un grupu musical, Ebano y Marfil. Tres la cena, ron y baille fasta les tres de la mañana. Angel nun ye capaz de baillar nin siquiera coles mulates. Espero que pa’l prosimu viaxe a Cuba faigan primero, el y Carmen, un master de salsa, casino y cha-cha-cha. De toles maneres, perbona la nueche.El restu la banda, dempués de filmar en Cueva Chiquita colaron nún todoterrenu pa Pons pa buscar a les putuques qu’anden con ellos. Mick quedose nel Hotel Los Jazmines, en Viñales. El so plan ye beber un botella ron y dormir n’una cama. Escaeciaseme comentar que nos viaxamos durante dos hores n’una camioneta rusa metios nel caxón de la carga. Camento que va más de 500.000 km. que tendrien qu’haber cambiao l’amortiguación.
4 de Marzu de 2000, Sábadu.
Güei madrugamos a les 6 de la mañana. Almorzamos y salimos otra vegada nel camionetu rusu pa La Coloma. Pasamos per Pinar del Rio, onde recoyemos a Lai, una ¿collacia? de Ramón que ta faciendo’l cursu d’axudante d’instructor CMAS (l’otru dia, na discoteca de Pons, tamién me presento otra ¿collacia?. Abultame qu’esti ye peor que puntabrava). En La Coloma tenemos qu’esperar más de dos hores a qu’arranchen el barcu y les botelles ya que naide avisó a esta xente de que saliamos a la mar. L’encargau d’avisalos foi Pedro Hernandez, el cabezaleru de la espeleo’n Pinar del Rio. Un que vacila d’haber fecho un mil ¡¡en Burgos!!. Abúltame que debe pesar unos 150 kg. bien corau...Cuba,mi linda Cuba. Dempués, otru cuartu d’hora pa que compreben nel puestu militar los nuesos pasaportes. Solo Ramón vien con nos, pues a Evelio y Lourdes nun los dexen salir nel barcu. Esto debese a la tendencia que tienen los cubanos caberamente de subise a cualisquier cosa que flote y dar pedal en direición a Miami. Pa evitar tentaciones, lo meyor ye nun dexalos nin subise a un tablón.
Magar qu’esti ye un barcu pa turistes, nun parez que funcione muy bien mecánicamente. El motor tos y dempués d’echar dellos gargaxos pel escape y facer retemblar tol barcu fai dar avante. Por fin salimos y ente nos abrese’l Caribe. Ye increyiblemente azul. Todo ye azul, la mar, el cielu, la lluz. Esa lluz que tolo envuelve y que nos fai revivir dempués de tantos dies de cueves, biesques y porqueria. A la media hora de navegación cruzámonos con una toliña y más allá con una aguamala desmanada. Cuando perdemos de vista la mariña cubana entamamos a ver daqué que lloñe parez un barcu, pero sigún nos averamos acolumbramos que ye una casa enriba d’una plataforma sofitada per abondos pegoyos. Esti llugar, metanes de la mar, ye ú descarguen los pesqueros les llangostes pa dempués cargales en barcos más grandes que les lleven a la costa. Lloñe, pero más cerquina, ya vemos los Cayos de San Felipe. El fondu onde vamos merguyar ta a 14 m. de fondura y vese nidiamente dende la superficie. Abaxu los colores muévense. Tóo tien color y ye un españiu de vida. Mansios de peixes siguen el nuestru nalar sigún nos vamos arimando a los carreiros qu’allinien el fondu y que tan lleraos de pequeñes cueves per onde asomen les antenes de les llangostes. A 25 m. de fondura alcontrámonos con una raya d’aguya de más de 2 m2 de superficie. Ta tranquila y déxase asemeyar. Asina llegamos a 30 m. y entamamos la torna’l ancla. Equí atopamos una parexa de peix-payasu grandes. Tan avezaos a los merguyadores y nun fuxen. En total 50 minutos d’inmersión. Ya nel barcu nun espero per naide. Cambio la botella per otra llena y vuelvo’l fondu. Doi otra vuelta a 18 m. de fondura ente los corales y los mansios de peixes de colores. Ablucante. Toñín baxa con Lai. Ye la primer vegada que merguya y parez que-y van salir los güeyos de les gafes. De vuelta, Ramón y Lai coyen tres llangostes que iguamos na plataforma. Ye la nuesa xinta de güei a bordu, acompangada d’ensalada, pescao, pollu y abondes cerveces. Dempués, un atapecer so la mar Caribe nun escaecible enxamás y dos hores de travesía nocherniega fasta La Coloma. Nun hai lluces que indiquen el puertu nin la canal d’entrada. Solo unos postes llenden la ruta con suficiente fondu pa llegar a tierra. Como si esto-yos importara a los yanquis en casu d’invasión.
Dende La Coloma salimos otra vegada nel camionetu rusu, pero esta vuelta’l friu déxase sentir. Son dos hores y media acuruxaos nel fondu’l caxón fasta llegar a Pan de Azucar y el que peor lo pasa ye Ramón. Nos tamos más avezaos al friu y lo que pa nos ye molestia pa el ye duro.
5 de Marzu de 2000, Domingu.
Diana a les 6. Güei vamos filmar al Hoyo de los Cimarrones y atacar el sifon de la C-5. Cárgase tol material en mulos y van llevalo dica la entrada del Hoyo de los Cimarrones. La marcha ye enforma sele, en parte porque’l camín de les mules ye más llargu y porque hay que parar delles vegaes pa grabar el carretar de les mules. Dende la portiella de Cimarrones báxase’l material al llombu dica la cueva. Dientro faense dalgunos planos, ya que la galería ye grande y col suelu de sable. Angel lleva la idega d’echa-y una güeyada al sifón y esto además hay que filmalo. Por fin métese y ta pel otru mundu 58 minutos. Los vascos nun esperen a qu’elli salga pa colar de la cueva. Tíra-yos de los coyones el resultao. Ensin embargu, los cubanos aguarden acoyonaos. Pa ellos ye munchu tiempu ensin saber que pasa’l otru llau. La tensión pudo cortase con un cuchiellu cada vegada qu’entrugaben el tiempu que pasare. Yo eche un llargu pigazu solamente interrumpiu por estes entrugues.
Cuando Angel sal vien contentu: la cueva sigue. Traviesó dellos sifones curtios y poco fondos y alcontró galeries de nalar. Nel momentu decídese que hay que volver pa continuar la esploración asina que dexamos ellí’l material de Angel. La vuelta ye tranquila, magar que los vascos tan nerviosos porque nun aguanten tantes hores de xera. Llegamos al campamentu a les 6 de la tarde. Como llevamos dos dies perllargos con poques hores de sueñu retirámonos ceu.
6 de Marzu de 2000, Llunes.
Dia tranquilu. Güei torna pa Madrid Toñín y toma’l mandu de la realización Mick Madden. Faense delles tomes de la vida nel campamentu y de les xuntes de trabayu ente merguyadores y espeleos. Sientese pel campamentu que los vascos anden en papeleos cola policia pola mor del puteriu. Pela tarde, dellos arimámonos a una poza nel riu Pan de Azucar. Vienme bien, ya que van dellos dies que faime falta un bañu n’agua llimpio. Tarde agradable ya interesante pelo que me comenta Ricardo. Pela nuechi, tertulia dica tarde con ron asgaya p’algunos.
7 de Marzu de 2000, Martes.
Dia de tocase los coyones. Vinieron de La Bana, de la corresponsalía de TVE pa facer un reportaxe so la espedición pa’l parte (estos que son más finos dicen el tilidiario), asina que pasamos la mañana a la solombra los toldos y dempués gráben-nos nel Nacimiento del Rio Cimarrones. Tamién graben dellos planos en Cueva Chiquita.La tarde pasamosla en iguar el material pa facer mañán la punta na C-5, nel Hoyo de los Cimarrones. Entraremos Angel y yo xuntos.
Ricardo, el productor, coméntanos que’l responsable políticu de Pons avisolu que si los vascos vuelven a andar coles neñes del pueblu espulsará a la espedición de Pan de Azucar. Parez ser que pueden acusalos de corrupción de menores. Esto desplica porqué Coco lleva dos dies escondiu nel campamentu. Na cena la tristura y la murnia acompanguen a los vascos xunto al plátanu y la malanga frita. El carneru taba perricu, Xiomara ta faciendo millagros.
8 de Marzu de 2000, Miércoles, Dia de la Muyer Trabayadora.
Madrugón pa dir al Hoyo de los Cimarrones. Ayeri, na xunta de trabayu alcordose facer un plan escritu y colgalu na tienda de material pa que tola xente sepia onde tien que trabayar cada dia. Ricardo fai agora de productor y parez ser muy políticu. Pa evitar problemes decidiose separtar a los vascos, asina la tensión ente ellos amenorga y chisca menos al restu la xente.Además de tomar dellos planos del Hoyo de los Cimarrones, Mick quier grabar el final de la película, ú los mocinos somos Angel y yo. Ye ablucante la vuelta que dió esta hestoria. Al entamu los mocinos yeren los vascos, pero a midia que foron amuesando que son unos pantasmes la situación foi tornando fasta ser nos los guapos. Pel medio tamién fuimos los responsables de que nun s’algamaren bonos resultaos. Nun sabe esta xente qu’enantes de merguyar hay que tener nidio que la cueva ta esplorada dafechu. Lleí nel viaxe a La Coloma: “Quien quier alcuentra preseos, quien nun quier alcuentra xustificaciones”.
El material carrétase otra vegada nes yegües. Nún parón del camín una tírame una patada que ráspiame la pierna y casi afaita a Evelio. Na cueva tol trabayu desendólcase rápido y Angel y yo metémonos pronto al sifón a esplorar. El primeru ye un sifón d’agua veyao con tueros atravesaos. A partir d’equí l’agua camúdase en daqué más llimpio. Entama una serie de sifones curtios y poco fondos qu’empaten con galeries aeries abiertes a favor d’una rede resquiebres. Les galeries aeries tienen abondes formaciones y colaes. Dalgunes son llaberíntiques, asina que montamos cordel nes fasteres nun somorguiaes. La visibilidá del agua ye asemeyada al Güeyu Deva pero un poco más veyao. Pasamos 6 sifones dafechu y camentamos que’l desendolcu algamao ye de 350 ó 400 m. más.
La cabera campana algamada tien, a la escontra de les otres, les paredes tapecies de repla y el únicu conductu que tien ye pel que llegamos. Equí tamos na llende’l filo y les lluces. Vientu tenemos enforma inda pero ye la hora salir. Pa nos la cueva acabose magar que ye cierto que puede haber otra continuación, pero nun ye la nuesa cueva nin la nuesa fastera. Los cubanos o los ingleses de James Hooper pueden seguir la nuesa esploración. Mientres salimos saco unes visuales pa poder nortiar un croquís. Baxamos tol material a Pan de Azucar y faise un nueu plantegamientu de la xera que nos queda. Tres la xinta de la nuechi abro la caxa de seguridá col llicor de mazana de Vigarto. A la xente presta-y.
9 de Marzu de 2000, Xueves.
Dia tranquilu. A les 12 la mañana entramos con Mick pa tomar planos somorguiaos nel primer llagu de Cueva Grande. Esto de la tele ye todo trampa; la verdá ye que si meten estos planos nel programa van dar muncha medrana a la xente. Agua veyao ú nun se ven más que les manos nun ye que seya muy apetecible pa merguyar.En Cueva Chiquita finense los trabayos de filmación y desistálase. En Cueva Grande tamién, pero parez la desistalación d’El Trabe (tol mundu sabe’n que s’asemeyen un castiellu escocés y un coche con matrícula de Bilbao). Sentau nel chamizu de la cocina veo venir al equipu que desistaló. Dos persones, equipu alpinu por supuestu. Entre los dos trayen cuatru saques, asina qu’arimome a cha-yos una manu a descargar. Enantes de que yo llegue Jabier azota les dos saques al suelu con visible esfuerzu. Yo garro les dos con una mano y llévoles a la tienda de material. Nun ye que yo tea muy fuerte, ye que vienen enllenes d’aire y daqué de cuerda. Ensin comentarios.
Per otru llau hay mal rollu col tema del sifón de Juanelo Piedra, allá en La Bana. Parez ser que a Wladimir nun-y gusta que venga tamién Evelio. Camenta que nun va poder ganar enforma. El problema ye que equí tou dios quier zucar.
10 de Marzu de 2000, Vienres.
Tola xente va pa la Sima del Lagarto, a Viñales, pa grabar delles tomes de téunica vertical...como estes cueves nun tienen pozos hay que buscalos. Nosotros, los merguyadores, quedamos nel campamentu tol dia pámpana arriba. Llimpiamos el material y preparamos coses pa dir ver los sifones averaos a La Bana y la surdencia de Mal Paso. La vuelta del equipu de la Sima del Lagarto ye la imaxe de la derrota mesma. Ye nidio qu’atacar un pozu de 20 m. de fondura acampanau ye una xera que puede acabar con culisquier paisanu con cascu. “H.orrible”, como dice Mick.
11 de Marzu de 2000, Sábadu.
Grabase la nuesa salida de Cueva Grande. Cuando yo entré a merguyar taba afaitau y agora tengo barba de casi un mes ¡Que llarga foi la esploración del sifón! El restu’l dia a tocanos los coyones, lleer, dormir, yaesu.Los vascos siguen intentando que xuba la presión, y tan consiguiendo que los cubanos se calienten escontra d’ellos. Son unos babayos.
Pela tarde organízase una folixa pa los guajiros. Vienen tolos veceros de Pan de Azucar, homes, muyeres y neños. Hay música y cancios fasta les 12 la nueche. Dempués, tertulia y ron dica sero.
12 de Marzu de 2000, Domingu.
Ye’l peor dia de tol viaxe. Nun hay na que facer. Vamos chando’l tiempu en guardar coses pa’l viaxe con tola calma’l mundu. Pela tarde cargamos dos viaxes de material nel carru los gües pa llevalo dica la carretera. L’ambiente ente vascos y cubanos cada vegada ye más envelenau. Yo caltengome al marxe, camento que nun merez la pena da-yos razón pa que s’entame una griesca. Nun son más que unos rapazucos babayos ya inorantes y nun me van fadiar esti viaxe.De nuechi hay movida, los cubanos anden tres los vascos. Estos, otra más, llevaron tola comida del almacen pa les sos fulanes ya dexaron-nos ensin cenar ya ensín almorzar mañan a tol grupu. Falta un pelu pa que s’enganchen Evelio y Koldo por esti tema. Yo medio y nun pasa res, magar qu’atalanto que lo que fizo que nun pasara nada foi la retirada de Koldo. Braeramente, Evelio da llerza, camento que lu acoyonó solo cola forma de falar...los sus casi 2 m. d’altor y el cuchiellu rambo que llevaba baxu’l brazu. Esti paisanu pasó cincu años na guerra d’Angola. Convídanos a cenar la familia Miranda y Evelio cuentame coses perinteresantes de la hestoria de Cuba y otres coses del so pasau qu’abultenme un tantu revesoses.
13 de Marzu de 2000, Llunes.
Güei terminamos d’empaquetalo todo y tresportamoslo nel carru gües dica la carretera. Despedímonos de la familia Miranda y de la xente de Pan de Azucar. Na escuela, xunto con Xiomara, repartoyos a los neños llapiceros, bolígrafos, papel y los carambelos y mars que sobraron, que fueron abondos.El restu’l dia echamoslu en viaxar a Pinar del Rio metanes d’un bastiazu que anuncia que ceu llegará la temporada de les lluvies. Agospiámonos cerca de Pinar, nún motel nomau Aguas Claras. Dempués d’un mes somorguiaos n’agua veyao, esti nome parez que nos da daqué d’esperanza pa nueves esploraciones. El motel ye bonu y tien una bona piscina, pero n’esti momentu lo que nos fai falta ye comer, porque la fame atrasao ye cosa mala. Magar que’l chigre, averau a la piscina y con terraza, tien bona pinta solo tien pan pa facer dos sanwich pero cerveza abondo. Dempués de delles cerveces decido pegame un calón na piscina, a ver si se me pasa el enfile. Como ye agua caliente salgo igual d’enfialu qu’entré, asina que echo un pigazu n’una tumbona fasta que m’esconsona otru bastiazu desmanau.Por fin vamos cenar y dempués baxamos a Pinar, al Cafe Pinar, que ye onde más ambiente hay de folixa. Equí coincidimos cola xente del grupu musical que tocó en La Guabina y tamos con ellos de comedia dica les 2 de la mañana. La negra calva azul prusia que-y prometieron a Angel nun apareció. A ver mañan.
14 de Marzu de 2000, Martes.
Salimos ceu pa la Sierra de San Carlos, u ta la “Surgencia de Mal Paso”. Ye’l peor viaxe que fice’n Cuba fasta’l momentu. Vamos nel suzuki que remana Ramoncito, un carru con amortiguadores que tienen más de 100.000 km., asina que corriendo pela carretera Luis Lazo, enllena baches y curves, llegamos fechos una llaceria. El paisaxe ye asemeyao a la fastera Viñales pero peme que más guapu inda. Tien más foces y la xerra parez más xabaz.La surdencia abrese embaxu la carretera. N’esti tiempu ta enforma seca y hay que baxar dellos metros dica atopar el llagu. L’agua ye llimpio pero ta embalsao. Enantes de colocame tolos trastes nalo pel llagu fasta l’estremu y parezme ver qu’equí hay una posible continuación somorguiada.
Les paredes parecen llimpies y nun suelta muncha basa. Al somorguiame decátome que l’estremu’l llagu ye un culu sacu, asina que nalo p’atrás en superficie y onde me parez que hay fondu dexome cayer averau a la parede manzorga. Ceu atopo una espada caliar que val de fracionamientu ; la fondura equi ye de 4 m. y los oyios nun me compensen.
Baxo dica’l fondu ensin compensar y alcuentrolu a 6,8 m. de fondura; ye una rampla de piedres pindia col agua nidio y perbona pinta. Como sigo ensin compensar decido surdir y dexalo. Angel decide entrar col mio equipu (ta de muerte) al oyime que’l agua ta llimpio. A partir del fracionamientu que yo montara alcuentra delles galeries cerraes y amiya a –15 m.f. a la gueta d’una continuación. Equí la galería entama a subir pero del techu cayen nubes de repla desmanaes. Les burbuyes cuerren pel techu y eso ye niciu d’una posible campana, pero nun paga la pena arriesgar más.Otra vegada de vuelta machacaos pela amortiguación, el mareu y la fame. Menos mal que Ramoncito convídanos a cenar un pavu en casa Omar. Dempués vamos ver un “chow” al cabaré Rumayor, pero Angelito esborónase al quintu “mojito”. La negra calva azul prusia sigue ensín aparecer.
15 de Marzu de 2000, Miércoles.
Güei hay que grabar la banda sonora del programa. El sr. Productor apalabró cola xente d’Ebano y Marfil pa que les sos canciones seyan el sofitu pa’l programa. Tamién hay que facer una toma caleyando per Pinar y parándonos a oyir al grupu tocando na cai. Esta toma hay que repetila más de diez vegaes por delles coses: Angel nun sabe baillar, los vascos, como de costume, faen el babayu, la xente cubano cuélase nel planu... un desastre.La tarde dedicamosla a mercar ron y tabaco y pela nueche faise una cena de despedida colos espeleólogos de Pinar. Los vascos cenen aparte. Arímase a la fartura Pedro, un gochu fartón que ye’l mafiosu que remana la espeleo na provincia de Pinar del Rio. Magar que ye un babayu pagamos-y la cena al convidar a la xente de Pinar. Angel y yo nun queremos y tamos a punto d’armala. Yo solo convido a la xente que trabaya y suda comigo nel monte, a la xente como esti fartón pagoyos la comida, a ver si arrevienten ceu. Dempués pásanos la mala llechi bebiendo ron y cerveza y baillando coles amables moces de Pinar. Por ciertu, toles coles que...falamos, dicen que son baillarines que se tan preparando pa’l tropicana...curioso. Dempués ficimos una entrada memorable nel hotel na alborecida. Ensin comentarios.
16 de Marzu de 2000, Xueves.
Madrugamos, anque podrie decise más bien que nun dormimos, yo polo menos. Pa rematar, esperanos el viaxe fasta La Bana na “guagua” amarrada con alambres y col suelu y los asientos de madera. Los vascos van atristayaos por dexar les moces en Pinar del Rio pero Mario y Pablo llevenles pa La Bana. Angel y yo facemos el viaxe descoyonaos de risa falando de milenta coses y recordando la estancia, que ya parez llonxana, en Pan de Azucar. Dos hores de high way y llegamos al Hotel Vedado, u hai agua caliente, ducha y otres comodidades. Tarde nel hotel pa descansar un poco y dempués de cenar paseamos pel Malecón, onde vemos como se tien que mover la xente pa sacar un “fula”. Xineteres, músicos, presuntos guies y buscavides que anden a la caza del turista. Todos de bon rollu pero delles vegaes un poco pesaos. Tamién hay muncha policia. Falamos, ente otres coses, del babayu de Wladimir, que anda xugando con dos baraxes y parezme qu’escoyó la de perder. A naide-y pruye que venga a Juanelo Piedra.
17 de Marzu de 2000, Vienres.
Güei ye’l caberu dia que tenemos que trabayar. Grabamos na Bana Vieya les caberes tomes del cuentu. El vuelcu ya ye total. Al entamu los merguyadores nun dibamos salir nel documental pero a media que foron pasando los dies fuimos ganando más protagonismu. Agora ya somos los mocinos de la película. Les tomes son cencielles, na Plaza la Catedral y na Bodeguita del Medio. Dempués vamos de compres al mercadín del Malecón y a tomar mojitos y comer na Plaza de Armas. A la nueche cenamos con el Pinche Gringo y la so moza en Miramar, onde meten-nos un clavel por arroz, frijoles, pollu y cerveza. Todos pensamos que diba convidanos Mick pero la so moza nun yera de la mesma opinion. Ya foi bastante pa ella rebaxase a cenar con hispanos. Mick cola al otru dia pa México y, magar d’esto, dexa una bona alcordanza. Camento que trabayó perbien.
18 de Marzu de 2000, Sábadu.
A les nueve tamos nel centru de merguyu d’Evelio. Retacamos botelles ya intentamos que daquién nos aclarie lo que vamos ver. Solo Quique, un collaciu mozu d’Evelio, tuvo na cueva que vamos a ver. Camenta que tien esplorao más de 260 m. en dos galeries somorguiaes. Wladimir nin siquiera tuvo ellí enxamas. La estimada hora de viaxe camúdase’n dos. A toles referencies, tiempos y medies hay que aplica-yos el fautor de tropicalidá. El llugar más averau a la cueva llámase San Antonio de los Baños y ta arrodiau de pequeños bohios onde viven los guajiros. La cueva recibe’l nome de Casimba de Juanelo Piedra porque enantes de la revolución la finca onde s’alluga yera d’esi señor, qu’entá vive con más de 90 años. Duren muncho los cubanos, como nun parez que trabayen muncho pues gastense poco. Evelio sabe por referencies que hay otra cueva asemeyada que llamen de Luis Piedra. El paisaxe ye perestremau de lo que toi avezau. Diz Carmen que Yucatán ye asina, una llanera desmanada tapecia d’espineres y matos.
La entrada orixinal de la cueva yeren dellos furacos nel suelu, que ye a la so vegada, el techu d’una salona con abondo agua. Na dómina pasada enancharon un de los furacos y picaron dellos escalones pa baxar a la sala. La sala tien tien unos 25 m. d’anchor por 70 de llargo. Abunden les formaciones y el techu ta llerau de cristales de calcita. Dalgunes estalactites somorguiense nel agua, que nun parez que té ellí.
Ye l’agua más claro que viera enxamas.Escoyemos la galeria de la manzorga. L’agua tien una visibilidá de más de 20 m. y les paredes tan lleraes de formaciones blanques.
La galería ye grande pero a los 50 m. tien una gatera fácil; sedría cenciella con botelles más pequeñes pero nos llevamos botelles chates de 12 ll. L’agua nun se veya nin na gatera. Llueu la galeria sigue estrencha pero cómoda y cada vegada hay más formaciones. Esto fina nún pasaxe estrenchu con basa y onde hay peligru de cayer costeros del techu. La otra galería ye enorme, espectacular.
Una grande sala somerguyada seguida d’una galeria de más de 10 m. d’anchor. Les paredes y el techu tan lleraos de formaciones: colaes, pinganiellos, escéntriques, yaesu. Dempués d’esnalar más de 100 m. ( el filu istalau ta ensin marcar) surdimos nuna campana. La continuación ye un pasu estrenchu forzau pelos espeleomerguyadores franxutes que tuvieron equí l’añu anterior, pero nun se sabe que hay más p’allá. Con estes botelles ye imposible.
EL filu ta istalau como lo faen los americanos, filu perfinu y fracionao y tensao a lo xole. Camentamos que la cueva inda tien posibilidades d’esploración y mañan volveremos col equipu de video y fotografia.Otra fartura de llangosta pa cenar y ceu pa la cama,anque dalgunu tresmanose pel hotel y nun atopó la habitación que tenia que ser.
19 de Marzu de 2000, Domingu.
Mañán ya nun tendremos el coche de Quique, asina que güei hay qu’espabilase. Llegamos más ceu qu’ayeri a Juanelo Piedra y organizamonos pa entrar. Carmen llevará la cámara de videu, Angel la Nikonos y Quique faera de foqueru, asina que yo soi’l galán. Merguyamos primero na Galería Claudia, la de les gateres. Esta galería esploraronla Quique y El Patas, el bomberu que conoció Javier nel so viaxe a Cuba. Grabamos dica la primer gatera. N’esta yo paso más de 10 minutos atorau al salir. Hay un momentu que nun soi capaz de dar alantre nin atras. Con calma solucionolo y queden unos planos perguapos de lo que ye atorase somorguiau. Dempués vamos a la Galeria Grande. Equí merguyamos fasta la sala de los cristales. Les paredes, el suelu y el techu tan lleraos de cristales de calcita. Nun toi avezau a esto, ye esnalar no que Mick noma Les Puertes del Cielu. Ye un bon final de merguyu, porque el restu remembrarelo como los merguyos más gochos que fice na mió vida.
De nuechi Angel y yo vamos ver la ceremonia del Cañonazu al castiellu del Morro. Interesante. Llueu cenamos na Bana Vieya y a partir d’equí entama una nuechi tebergana, onde fasta casi hay una visita al cuarton de La Bana. ¡Gallego, me vuelve’ loca! ¿donde tu ettuvitte toda mi vida? Cuba, mi linda Cuba...
20 de Marzu de 2000, Llunes.
Carretamos pela mañana el material de merguyu pa’l hotel y espardimos tolos trastes na habitación. Confirmase una vegada más que l’espeleólogu ye capaz d’ocupar tol espaciu al so alredor espardiendo tol baruyu que carreta enriba d’elli. Dedicamos el dia a caleyar per La Bana, visitando el Vedado, la Plaza de la Revolución y l’estremu ocidental d’El Malecón. Ye ablucante lo que ocupa esta plaza; cuentenme que, tolos años, dalgunes selmanes enantes de dalguna cellebración revolucionaria, toles hormigoneres de La Bana ponense a furrular pa iguar el suelu la plaza. Si llueu nun hay cementu pa iguar les cases de Cuba, ye lo mesmo, dexenles baltiar, pero la plaza tien que salir guapa na tele y nes pantalles de los satélites yanquis. Nel monumentu a José Martí dame por llanciar una proclama al pueblu pero solo tan pa escuchame Angel y Francis y nun me faen munchu casu. Asina como nun soi capaz d’enardecer a les mases (Angel y Francis ya parecen enardecios) propongo-yos dir chumar unes cerveces.De nuechi vamos cenar al otru llau de la bahia de La Bana, cerquina del castiellu del Morro. Dempués tomamos milenta mojitos ya que ye la cabera nuechi’n Cuba. Abrazos, lloros, xuramentos d’amistá eterna, d’hermamdá, promeses d’amor eternu, volvemos l’añu que vien, vivas a la revolución, a la madre patria...Tolo que se diz n’eses condiciones. Menos mal que la mió frialdá atlántica faime contemplar estes coses dende un escalón más altu. Son coses que los que nun mamen la borrina y l’orbayu nun pueden atalantar...Y además, a estos gusta-yos muncho echa-y teatru a toó.
21 de Marzu de 2000, Martes.
Llevántome ceu. Quedé con Carmen n’axudala a pasar el cargu pela aduana cubana. Ye más d’una tonelada de material, y llama l’atención que casi llevemos el mesmu pesu que traximos. Esto désplicase porque donde venia la comida, parabolts, spit, yaesu... agora va ron, habanos, machetes y estremaes pieces d’artesania. Los trámites ocupen-nos tola mañana. Detallar, pesar, volver a detallar, volver a pesar.Vamos comer a La Bana Vieya y a facer tiempu fasta la hora de dir pa’l aeropuertu. Despedia otra vegada nel hotel. Espectáculu. Más abrazos, más lloros, más promeses d’amistá, d’hermandá, d’amor eternu, de nun escaecer enxamas, bla, bla, bla...yaesu. Magar qu’esta vegada nun parez que naide te enfilau. Toó esto vuelve a repetise otra vegada nel aeropuertu. Amás, equí tamién se ven el restu de despedies de tolos que s’embarquen nel avión. Tal y como si fuera una película de Gutierrez Alea. Les (y supongo que tamién los) que se queden equi aprovechen, ya que tan nel aeropuertu, pa conocer dempués de la dolorosa despedia el que sedrá’l so amor de la so vida pa los prósimos 7 ó 15 dies...
Hay que compaltil para resolvel, mi amol.Sigún me siento na butaca l’avión acabenseme les piles. Sientome tan cansau que hasta me fadia que nun me quiten pronto la cena. Un sueñu pesau como un llábana faime cerrar los güeyos y nun esconsonar del tóo fasta que Carmen me diz: Estamos sobrevolando la costa portuguesa.
22 de Marzu de 2000, Miercolés.
Bien, nin m’enteré del viaxe. En menos d’una hora aterrizamos en Madrid. Hay que recoyer tol equipaxe de manu y los trastes de cine que viaxen con nos.....Y por fin tamos n’España. Un picoletu aburriu, malencarau y bederre obliganos a abrir tolos paquetes, nun seya que queramos colar daqué. Ya fuera del aeropuertu despedímonos de los de la tele. Un furgoneta de TVE llevanos a traviés de Madrid a les estremaes estaciones de autobus. Miro pa’l norte y vense nubes escures. Entrugo-y al xofer y dizme que’l pronosticu ye de temporal de nieve nel norte. Idegal, toi fartu de calor, de lluz, de mosquitos y prúyeme agora revolcame’n nieve, abrigame y sentir frio na cara.
Angel llega xusto pa garrar la llinea de les 4 pa Elche, yo tengo que esperar fasta les 6. Dempués de despedime camento la suerte que tuve por poder xunime a esta espedición y conocer a un paisanu como Angel. Solo por elli ( y por Carmen, por supuestu, magar que ya la conocia) ya pagó la pena aguantar a los babayos de los vascos. La conclusión ye que lo pasamos per bien y qu’esti va ser un viaxe pa remembrar.Nel viaxe n’ALSA chumo dos botelles de rioxa, que me sienten como dios pa dir dormiendo hasta L.l.una. Equi esconsóname una sensación ya familiar. Magar de l’aire acondicionau puedo sentir l’aire de les biesques y l’arume de la nieve que tapez el cordal. Toi nel mió pais otra vegada. Tras la vertixinosa amiyada del Güerna darreu llegamos a Uvíeu, onde m’espera Marife. Pronto llegamos a ca mió má onde disfruto d’un platu sopa que bien echaba de menos. Estes son les coses que me faen saber de onde soi.
"Na semeya d'arriba, Charles Wright, miembru de la Espedición a l'Antártida del Capitán Robert Falcon Scott, 1910-1912.Nes semeyes d'abaxu, Aspley Cherry-Garrard dempués de tornar del viaxe d'inviernu y acompangau de Wilson y Bowers.
Priestley, compañeru de Cherry-Garrard escribe esta entrada nel so diariu refieriendose a los homes d'Amundsen el 4 de Febreru de 1911:"Bien, ya dexamos a los noruegos. Pensamos muncho n'ellos, por nun decir enforma. La impresión que me dexaron ye la de un grupu de homes de marcada personalidá, duros, ensin dulda acostumaos a pasar penuries, muy perseverantes y de bon calter. Esta bayura cualidades camudalos en rivales enforma peligrosos, pero magar d'esta rivalidá , ye imposible nun tene-yos simpatía."
Javier, Jorge Lopera, Alfonso Machín y Luis Ochoa na campera del Pozo Azul. Febreru de 2006.
Alvaro Subiñas, Jorge Lopera y Josep Guarro pasando datos de la topografia del Pozo Azul. 2 de Payares de 2005, nel chigre Las Muñecas de Covanera.
Javier y Bernat Clamor en la Cova de Sa Gleda.
Josi Olave, Josep y Javier tres l'empate ente la Galería del Aburrimiento (Rede d'Ojo Guareña) y el Sifón Resplandor de la Torca Villallana.
Dempués d'unos años, en 1999, espeleologos del G.E Gorfolí entren peles galeríes aeries cimeres y dempués de baxar dellos pozos que podrien dar pasu a les galeríes del riu soterrañu atopen otra vegada paredes de formigón, dalgunes col enconfrao entá conservao.
Equi, el banzau que recoye les agües surdies nel Güeyu'l Riu.
Estos mesmos veneros foron esplotaos anteriormente por ástures y romanos. Paga la pena visitar esti pueblu pantasma p'alcontranos al pie de l'Aramu un llugar de típica arquitectura minera galesa.
L'agua que s'empobinaba a esti pueblin provien d'un veneru picau pelos mineros y canalizau pela cueva con un canal de lladriyos.
Atalantamos qu'esti agua que surde equi vien de la faza del Mallau d'Espines y del despareciu Pozu Gancios, del que nos contaron que tenia tou un sistema d'entibación fecho pelos mineros pa baxalu a la gueta d'una ayalga.
Tres casi tres selmanes de lluvia casi ininterrumpida tolos acuiferos tan saturaos, polo que ye normal que boten agua per caulquier llau.
N'esta faza ente Banugues y Aboñu el escar tapeciu pela vexetación aparez nidiu baxu l'agua, dando llugar a un paisaxe somarín de muncha guapura enllenu de pequeñes cueves, corredores y pequeñes foces somorguiaes.
